路人有感-為左安居樂業你可以放棄d咩

 

我 – 路人，係一個八十後既少年。
同好多香港人一樣，每日都係營營役役咁樣去為口奔馳。
我每日返工既目標除左係解決三餐溫飽，供養家庭外，其實最終都係想將來既生活可以安居樂業。

我相信大家都明白到係香港要做到“樂業”，又談何容易呀。
因為要“樂業”就必先“安居”。
但如果要“安居”，而又無好似係各大真人勵志故事中既“外力”幫助的話。
咁就真係談何容易呀。

即使事實如此，但我都無放棄到，盡量減少多餘消費，將每個月辛勤既回報盡量儲起，希望他朝一日可以真真正正成為勵志故事入面既主角。
直到果晚‥‥‥

果晚，我七點就離開公司大門，我見難得時間尚早，就去左一個大形商場行下街，諗住輕鬆下，放鬆下。
如是者，當兩手空空既我再次望錶既時候，時間已經係八時四十分，我知道係時候要返屋企，好好休息預備明天既工作。
因為距離歸家都重有好一段車程，而我亦覺得口渴。
剛剛係我眼前就出現左一間便利店，我亦順理成章咁走入去，想買支普普通通既水黎解渴。

當我走到雪櫃既最右邊，我見到面前既係五花八門既樽裝水，有選擇困難既我，就決定以價錢為主要考慮因素。
8.4、8.7、6.9、12.3‥‥‥
係我面前既一堆“天文數字”，大家唔好誤會，我唔係剛剛係赤處出黎，我明白近年物價係有火箭式既升幅。
事實如此，但能唔能夠令我接唔接受又係一個另問題。
我接受唔到既唔係支水有幾貴。
我接受唔到既係我每日辛勞工作，換返黎既成果，竟然係連買支水都要猶疑。
我已經無勇氣去睇左手面既汽水櫃同啤酒櫃‥‥‥

係好耐之前，我已經放棄左朱古力、糖果、薯片依一類天文食物。
估唔到到左2014，我要放棄埋依支水。
我究竟重要放棄幾多，或者應該係話，我重有咩可以放棄，先可以達成安居樂業既目標。